A Window in Thrums Part 14

He worked his mouth round and round, to clear the course, as it were, for a sarcasm.

"Fowk often say," he continued, "'at 'am quick beyond the ordinar' in seeing the humorous side o' things."

Here Tammas paused, and looked at us.

"So ye are, Tammas," said Hendry. "Losh, ye mind hoo ye saw the humorous side o' me wearin' a pair o' boots 'at wisna marrows! No, the ane had a toe-piece on, an' the other hadna."

"Ye juist wore them sometimes when ye was delvin'," broke in Jess, "ye have as guid a pair o' boots as ony in Thrums."

"Ay, but I had worn them," said Hendry, "at odd times for mair than a year, an' I had never seen the humorous side o' them. Weel, as fac as death (here he addressed me), Tammas had juist seen them twa or three times when he saw the humorous side o' them. Syne I saw their humorous side, too, but no till Tammas pointed it oot."

"That was naething," said Tammas, "naething ava to some things I've done."

"But what aboot Mag?" said Leeby.

"We wasna that length, was we?" said Tammas. "Na, we was speakin'

aboot the humorous side. Ay, wait a wee, I didna mention the humorous side for naething."

He paused to reflect.

"Oh, yes," he said at last, brightening up, "I was sayin' to ye hoo quick I was to see the humorous side o' onything. Ay, then, what made me say that was 'at in a clink (flash) I saw the humorous side o'

Gavin's position."

"Man, man," said Hendry, admiringly, "and what is't?"

"Oh, it's this, there's something humorous in speirin' a woman to let ye aff so as ye can be married to another woman."

"I daursay there is," said Hendry, doubtfully.

"Did she let him aff?" asked Jess, taking the words out of Leeby's mouth.

"I'm comin' to that," said Tammas. "Gavin proposes to me after I had haen my laugh--"

"Yes," cried Hendry, banging the table with his fist, "it has a humorous side. Ye're richt again, Tammas."

"I wish ye wadna blatter (beat) the table," said Jess, and then Tammas proceeded.

"Gavin wanted me to tak' paper an' ink an' a pen wi' me, to write the proceedins doon, but I said, 'Na, na, I'll tak' paper, but no nae ink nor nae pen, for there'll be ink an' a pen there.' That was what I said."

"An' did she let him aff?" asked Leeby.

"Weel," said Tammas, "aff we goes to Mag's hoose, an' sure enough Mag was in. She was alone, too; so Gavin, no to waste time, juist sat doon for politeness' sake, an' syne rises up again; an says he, 'Marget Lownie, I hae a solemn question to speir at ye, namely this. Will you, Marget Lownie, let me, Gavin Birse, aff?'"

"Mag would start at that?"

"Sal, she was braw an' cool. I thocht she maun ha'e got wind o' his intentions aforehand, for she juist replies, quiet-like, 'Hoo do ye want aff, Gavin?'

"'Because,' says he, like a book, 'my affections has undergone a change.'

"'Ye mean Jean Luke,' says Mag.

"'That is wha I mean,' says Gavin, very strait-forrard."

"But she didna let him aff, did she?"

"Na, she wasna the kind. Says she, 'I wonder to hear ye, Gavin, but 'am no goin' to agree to naething o' that sort.'

"'Think it ower,' says Gavin.

"'Na, my mind's made up,' said she.

"'Ye would sune get anither man,' he says, earnestly.

"'Hoo do I ken that?' she speirs, rale sensibly, I thocht, for men's no sae easy to get.

"''Am sure o' 't,' Gavin says, wi' michty conviction in his voice, 'for ye're bonny to look at, an' weel-kent for bein' a guid body.'

"'Ay,' says Mag, 'I'm glad ye like me, Gavin, for ye have to tak me.'"

"That put a clincher on him," interrupted Hendry.

"He was loth to gie in," replied Tammas, "so he says, 'Ye think 'am a fine character, Marget Lownie, but ye're very far mista'en. I wouldna wonder but what I was lossin' my place some o' thae days, an' syne whaur would ye be?--Marget Lownie,' he goes on, ''am nat'rally lazy an'

fond o' the drink. As sure as ye stand there, 'am a reglar deevil!'"

"That was strong language," said Hendry, "but he would be wantin' to fleg (frighten) her?"

"Juist so, but he didna manage 't, for Mag says, 'We a' ha'e oor faults, Gavin, an' deevil or no deevil, ye're the man for me!'

"Gavin thocht a bit," continued Tammas, "an' syne he tries her on a new tack. 'Marget Lownie,' he says, 'yer father's an auld man noo, an' he has naebody but yersel to look after him. I'm thinkin' it would be kind o' cruel o' me to tak ye awa frae him?'"

"Mag wouldna be ta'en wi' that; she wasna born on a Sawbath," said Jess, using one of her favourite sayings.

"She wasna," answered Tammas. "Says she, 'Hae nae fear on that score, Gavin; my father's fine willin' to spare me!'"

"An' that ended it?"

"Ay, that ended it."

"Did ye tak it doun in writin'?" asked Hendry.

"There was nae need," said Tammas, handing round his snuff-mull. "No, I never touched paper. When I saw the thing was settled, I left them to their coortin'. They're to tak a look at Snecky Hobart's auld hoose the nicht. It's to let."

CHAPTER XVI

THE SON FROM LONDON